Leef Zawpense,
Aan de väöraovend van 2022 wólle weer toch nog efkes trökkieke op ein apaart jaor. Ein jaor wo geine vastelaovend gevierd koos waere, althans neet zóa es weer dat kènne en gaer höbbe. Neet same in de Beegse kaffees, in eine optoch of op ’n boetezitting, mer gewuen toes op de bank. Gein nuuj Prinse en Prinsesse en geine nuje Iërezawpens, mer gewuen dezelfde nog ‘ns :p. Gein verseerde groepe en wages oppe straot en bienao geine meziek. Bienao zèk v’r, ómdat in Beeg men neet gaw stilzit, mer altied gezoog wurdt nao ein alternatief. In ’t huidige digitale tiedperk is gelökkig väöl mäögelik en wurdt ouch väöl gedaon. De Zawpense hele väör de iëste kïër eine digitale kwis (Zawpense Breingymnastiek op aafstandj) en ouch de Roepoepers dege mit hun Beegter Vastelaoves Konkoer eine duit in ’t zekske. De Beegse kènjer krege dit jaor ein digitale bühne óm hun leedjes en denskes te laote zeen. Óm neet gans mit de vot aan de bank te blieve plekke organizeerde de Zawpense nog eine echte speurtoch en stiekem woort door ein aantal Beegtenaere toch eine optoch geloupe. Daonao woort ’t ’n biejte stil en ederein houpde dat aan dae Corona kraom gaw ein ènj kaom. Helaas! Nog ummer mótte weer oetkieke en ouch dit jaor zal ’t weer anges dan anges zeen. In de ingelasjde perskonferentie höbbe de Zawpense helaas bekènd mótte make dat ouch dit sezoen gein nuuj hóagwaardighede waere oetgerope. Ouch alle aktiviteite die normaal in ein sezoen georganizeerd waere zulle neet doorgoan. Weer hawte waal alle berichte van Mark en Hugo in de gate en wo ’t kènt, maog en verantwoord is gaon v’r get doon.
De Zawpense wille uch toch allemaol bedanke väör ’t aafgeloupe jaor. Ederein dae mit gedaon haet aan ’n aktiviteit en ós gesteund haet mit de Rabo Clubkas aksie of via Sponsorkliks.
De kómmende tied gaon weer kieke wat d’r allemaol georganizeerd kènt/maog waere, mer sjrief uch zónjig 6 fibberwarie mer alvas in de agenda, want dan zal de twiëde Zawpense Breingymnastiek op aafstandj georganizeerd waere (mïë info later).
Väör noe wille weer uch alvas eine goje roetsj wunsje, hawt uch good en blief gezóndj!
Maske op, Maske Aaf!
Zawpense Alaaf!
