Ós Senioreprinses Lies is gebaore op 9 april 1954 es ein ech Zawpenske op de Paeperstraot 28 in Beeg mit de name Elisabeth Maria Rinier Bours. De Senioreprinses greujde op in ein laevedig gezin van 7. Same mit pap, mam en twië breurs vormde ze mit oma en de broor van häör oma – mit wae oma same ’t kaffee ’t Vaerhoes runde – ein werm mer drök hoeshawe. Häöre pap zaot gaer väör ’t buffet óm ein pötje te kaarte, terwiel “de Moder”, wie oma leefkozend geneump woord, altied de hoofrol speelde in ’t gehiël. Ós Senioreprinses waor nog te jónk óm in ’t kaffee te helpe en woort dèks weggesjik, mer vónj zichzelf al vreug wies en zelfstenjig (dat vónj ze zelf althans).

Ónger toezich van häör nichskes maogde ze mitgaon danse bie de Molenbron in Lömmerich en ouch in Stokkem (B) waor ze regelmaotig te vènje. Dao óntmoede ze de leefde van häör laeve: Thé Salden oet Uerménd, ein echte waterrat. De senioreprinses waor toen 16, Thé 17,5, mèr ze wóste al gaw dat ze same wujer wóllle. Op häör 18e trouwde ze väör de wet (mer nog neet väör ’t bèd). Ze kochte ein stök grondj aan de Linjestraot en nao de deensjaore van Thé boewde ze same hun hoes, mit hulp van beide vaders. Op 10 jannewarie 1975 kaom häöre prins mit ein koetsj en veer paerd nao de Paeperstraot en begoos hun echte laeve same.

Hun jaore waore gevöld mit oetgaon en vekansies oppe motor. Ze reje väöl kilomaeters en belaefde prachtige tieje in Italië, Frankriek en Kroatië, wo ’t altied fiës waor oppe kemping tössje vrunj en motore. In 1978 woort hunne iëste zoon Guido gebaore. Dat veel in eine spannende periode, want Harrie Faassen haw hun gevraog Prins en Prinses te waere. Lies stóng dao väör aope, Thé twiefelde. Ze sproke aaf dat ze ’t zawwe doon es de baby op de 11e vd 11e gebaore zouw waere. Toen dae datum korterbie kaom, vónje ze ’t toch waal spannend. Oeteindelik is Guido op de 13e gebaore en op 27 juli 1980 volgde hunne twiëde zoon Edwin

Lies en Thé woorte lid van de tennisklup in Beeg en de kènjer stónge al jónk mit ein pletsj op de baan. ’s Aoves driëjde Lies de ketien, terwiel Thé studeerde väör zien baan bie KPN Telecom. Later ging Senioreprinses Lies wirke in Vouershof bie de Flaarisse in Gelaen. ’t Waor d’r altied drök: riesjóale, exames, zaalvoetbal, tennis en rómmelmerte. 15 jaor geleje woort ’t gehiël ómgeboewd tot ein prachtige sportklup en de Senioreprinses wirkde d’r oeteindelik 28 jaor mit väöl plezeer, tot ze 5 jaor geleje van häör verdeende pensjoen ging genete. Inmiddels geneet ózze Senioreprinses van 4 kleinzone, ein bonusdochter en bonuszoon. De tied vlug väörbie.

Tiejes de coronaperiode maakte Lies en Thé hun hoes laevesbestendig. Same klusse aan ein sjóan projek en de baoveverdeping woort ingerich väör de väöle fitsvrunj die langs kooste kómme. Mer net wie alles klaor waor, sjloog ’t nóadlot toe.