Seniorepaar 2025: Wil en Monique Hermans-Barten


Senioreprinsepaar 2025: Wil en Monique
Senioreprins Wil is gebaore es Willy Anna Johannes Hermans op 28 april 1960 oppe Wilhelminalaan 17 in Beeg en is de zoon van Hub van Megeelke Hermans en Sis Hermans-Deuss. Hae haw ’t gelök te maoge opgreuje mit zien drie zösters José, Lea en Saskia.
Senioreprinses Monique is gebaore es Maria Jacqueline Monica Barten op 8 miërt 1960 bie de Marrotte in Zitterd es dochter van Jeu Barten en Annie Barten-Jamar. Begin 1961 zeen zie same mit broor Leon verhoes nao de Kasteelwaeg in Bor.
Wil en Monique höbbe zich in 1975 liëre kènne in ’t ”oetgaonswalhalla” van dae tied: Bartok Bor. De place to be väör de jeug van Beeg en Bor.
Wil is es kleine jong al vreug nao väöl hoeze gaon kieke dae ziene pap allemaol geboewd haet, ouch in Beeg. ’t Koos dus neet oetblieve dat Wil en Monique ouch in Beeg ginge boewe. De iëste sjup ging in 1980 de grond in oppe Meister Speestraot 2 in Beeg. Taegeäöver de aw Maedjessjóal, tiedelik gemeintehoes en oeteindelik ’t Seniorehof alias de “Vrouwevläögel”. In 1992 is hun dochter Kristy gebaore en in 1994 dochter Britt. Kristy en sjóandochter Loek wone in Nuujstad. Sinds fibberwarie 2024 is ós Senioreprinsepaar opa en oma van kleinzoon Siem en es God blif in mei 2025 van ein kleindochter. Britt is mit zien Vastelaoveshart gaon wirke in Utrech en woont dao noe al 7 jaor. Dao is zie ouch häöre vrunj Roché taegegekómme.
Ós Seniorepaar is 40 jaor langk ein ech “Bankstel” gewaes. Wil haet sinds 1980 op 8 versjillende Rabobank lokasies gewirk en Monique sinds 1979 bie Rabobank Zitterd mit de nuedige fusies.
Wil en Monique höbbe jaore langk de optoch in Beeg geloupe mit buurtvereiniging ’t Pelleveldj. Van dees buurtvereiniging is Wil jaorelangk bestuurslid gewaes. ’t Waor eine hiël gezellige tied, zeker tiejes ’t boewe van de Vastelaoveswagel bie Kitty en Fred. Ouch woort d’r mitgeloupe in optochte boete Beeg: mit de hiël femilie bie de Louvermen in Buchte, wo zös Lea en Thei prinsepaar zeen gewaes en later ouch bie Tim en Inge Meekels. Ouch in Nuujstad wie zöster Saskia en Roy prinsepaar waore.
In Bor höbbe zie same mit ’t huidige Senioreprinsepaar van Bessemebènjers Lei en Marianne Kirkels nog eine iëste pries gehaold.
De kèns waal zigke dat bie de femilie de Vastelaovend in ’t blood zit. Sjóanbroor Pieter haet jaore väöl mildaajes oetgereik en is zelf Iërezawpens geweaes en of ’t zao huert zal in mei 2025 ‘t 3 x 11 dus 33ste femilielid gebaore waere.
In de vrieje tied zeen Wil en Monique drök bezig. Van diverse verbouwinge van hun huis, oppasse oppe kleinzoon, op stap gaon, fiëskes organizere en biewonen. Niks is te gek: Pinkpop, Oktoberfest, Pinksterkirmis, kersmert Leuven tot broewerij Mezeik. Mèr ouch geweun gezellig get drinke en aete bie kaffee Aurora.
Op vakansie gaon doon zie ouch hiël gaer. D’r zeen al hiël get lanj bezoch, de kèns ’t zo gek neet bedinke. Hie höbbe ze ein gooje kondisie väör nuedig. Wil haet vreuger bie Armada gevoetbald en Monique gehandbald in Buchte en daonao gevolleybald in Obbeeg. Taegewoordig zit Wil op eine renfits en Monique bie de Zumba. Verder make zie geregeld oetstepkes mit hunne foetelfits.
Aan vriewilligerswirk wurdt ouch gedaon. Wil bie de financiële commissies van ’t OLS en ZLF en Monique drök in de weer mit de buffetdeenste.
Op deensdig 29 oktober ging de deurbel oppe Meister Speestraot 2 en stóng Eric Mulleners väör de däör, of haet efkes bènne moch kómme. Is Monique ouch toes voor hae en toen kwaom ein zenuwachtige gedachte bie Wil nao baove. En inderdaad kwaom de vraoge of Wil en Monique Senioreprinsepaar van 2025 woole waere. Verras mèr ouch veriërd woort al snel bevestigend geantwoord. Dit fiëske wille zie hiël gaer ‘ns van kortbie mit make.
Wilt geer ‘t Senioreprinsepaar bezeuke of belle? ‘t Prinselik palies is gelaege aan de Meister Speestraot in Beeg.
E-mail: w.hermans6@ziggo.nl