Prins Denny I is gebaore op 23 mei 1982 in ’t Barbaraziekehoes in de waereldstad Gelaen. Bie de gemeinte stuit hae ingesjreve es Denny Johannes Barbara Maria Demandt. Hae is opgegreujd aan de Kempenwaeg in Obbeeg wo hae woonde mit zien awwers Nic en Margriet en zien awwer zus Sylvia. ’t Vastelaovesblood zit bie hun good in de femilie, want ouch zien mam en zöster zeen allebei in Obbeeg bie CV De Reube al (seniore)prinses gewaes.

Prins Denny I haet op bazissjóal Willibrordus in Obbeeg gezaete, wonao hae nao St. Jansberg in Belsj is gegange. Dao haet hae de opleiding tot automonteur aafgeróndj, mer is daonao via zien zaoterdigbaantje in de boew terech gekómme. Van dao oet haet hae versjillende jaore ervaring opgedaon bie versjillende aannummers, wovan de langste tied bie Aannummersbedrief Pisters, wo hae de kneepkes van ’t vak haet geliërd.

Nao gelökkig weer herstèld te zeen van ein vervaelende ziekteperiode, kaom ’t besef dat ‘t laeve neet altied vanzelfspraekend is, en haet Prins Denny I zien kans gegrepe óm ziene druim waor te make en ein eige bedrief op te starte. Sinds 2015 is hae in de ómstreke van Beeg aan de sjlaag es Denny Demandt Bouw mit de meis oeteinloupende verboewinge en renovasiewerkzaamhede. De Prins steit ouch regelmaotig boete de reguliere wirktieje väör ederein klaor es urges ein klusje te klaore is.

De Prins haet vreuger zelf altied bie R.K.V.V. Obbeeg gevoetbald en vundjt ’t daoróm sjiek dat hunne zoon Joris noe fanatiek voetballer is bie S.V. Argo. Prins Denny is dan ouch eder waek langs de lien te vènje bie edere wedstrijd van de JO12.

Naeve zien werk, de verzörging van hun drie kènjer en ’t óngerhawte van hun hoes en tuin, blif neet väöl tied äöver väör anger dènger. Prins Denny I hilt erg van gezelligheid, kaoke en lekker aete, af en toe ein pilske pakke mit de wageboewers en ouch bie hun toes stuit de koffie altied klaor es eine bènne kump valle.

Prinses Sandra is gebaore op 6 augustus 1981 in Haelder. Bie de gemeinte stuit zie ingesjreve es Sandra Hubertina Maria Offermans. Prinses Sandra is ein dochter van Huub en Mia Offermans en haet ein awwere zöster Patricia en eine broor Rogér. De Prinses is opgegreujd in de Abdisstraot en later nog in de Eikestraot in Beeg. Prinses Sandra haet op bazissjóal Pestóar Franck gezaete, daonao haet ze de HAVO gedaon op ’t Kleesj in Zitterd. Vervolges ging zie in Haelder nao de Hóagesjóal Zuyd wo zie de opleiding Facility Management haet aafgeróndj.

Vanoet häör opleiding haet Prinses Sandra väör häör stage versjillende maonje in Zuid-Afrika gewoond. Nao häör aafstudere kreeg zie ein baan aangebaoje in Mestreech bie ein vastgoedmanagement bedrief.