Prinsepaar 2025: Rob en Kim Breuls-Evers


Prinsepaar 2025: Rob en Kim Breuls-Evers
Prins Rob I is gebaore op 28 juni 1974 in Houtem. Bie de gemeinte stuit hae bekènd es Robertus Cornelis Breuls, mit ‘t sterrebeeld kreeft. Prins Rob I is opgegreujd in ‘t Katerriek. Hae is de zoon van Jo Breuls en Annelies Breuls-Salden en gróate broor van zien zösterke Marieke. Ziene pap is erg jongk gesjtorve en zien mam is jaorelang same gewaes mit Beegtenaer Jo Brouwers van op ‘t Geneer, dae helaas ein paar waeke geleje is äöverleje.
Naodat Prins Rob I in Houtem de laegere sjóal haw doorloupe is d’r nao 't Kleesj in Zitterd gegange. Dao zaot hae in ein klas mit väöl luuj oet Beeg en vanaaf dat moment waor d'r in Beeg te vènje, mit name bie kaffee Aurora. Wie hae in Zitterd klaor waor, is ózze Prins in Mestreech rechte gaon studere.
In 1998 is Prins Rob 1 es advocaot aan de schjlaag gegange. Hae runt same mit ziene kompaan Frans 't kantoor Bronneberg Breuls Advocaote in Gelaen. Hae geuf dao hun klantje wieze raod.
In ziene vrieje tied duit de Prins gaer jage en speelt hae trómpöt en jaghoorn, klust gaer en is vaak te vènje in de tuin van 't Prinselik palies. De Prins is al jaore langk besjtuurslid bie Sjötterie Eendracht. Mit die sjötterie haed hae es väoropsjöt in 2013 't OLS nao Beeg gehaold. De Prins traejt bie gelegenheid mit zien trómpöt op mit de Brammerttaler. Hae is ein van de oprichters van 't legendarische “Beegter Zoep Front” en lid van “De Boefjes”. Hae is ouch väörzitter gewaes van Jongerevereiniging Allemaol Kwatsj.
Prinses Kim is gebaore op 18 november 1976 in Zitterd. Bie de gemeinte stuit zie ingesjreve es Kim Bep Harrij Evers mit ’t sterrebeeld schorpioen. Prinses Kim is opgegreujd in 't Zawpenseriek, wo zie same mit häör awwers Lambert en José Evers en zösterke Daisy oppe Beneluxlaan woonde. De pap en mam zeen gein vraemde in 't Zawpenseriek. Prins Lambert I waor de iëste jubileumprins van de Zawpense en 11 jaor later woort hae oetgeroope es Iërezawpens. Vastelaovend is de prinses dus mit de paplaepel ingegaeve. Väöl van häör femilieleeje zeen de aafgelaupe jaore ouch (jeugd)prins/prinses gewaes bie de Zawpense. Zoon Joep is 12 jaor geleje nog kleuterprins gewaes.
De prinses haet op de basissjaol in Beeg gezaete wonao zie iës op 't Serviam in Zitterd ein paar jaor haet geleerd mer daonao exame haet gedaon op de Mavo in Bor. Daonao haet zie de MEAO in Zitterd gedaon.
De prinses wirk es bennedeens verkouper bie L&P in Gelaen wo zie de spil en vraagbaak is, van alle mansluuj die dao wirke.
In häöre vrieje tied duit ós Prinses gaer jatse, is sikretaris bie de opleidingscommissie van Hermenie St. Cecilia en bie 't Trevianum is zie te vènje es lid van de klankbordgroep. Bie de Jeugddrumband Aw gemeinte Bor hulp zie de jeug mit alles wat neudig is.
Ós Prinsepaar haet zich in 2002 liëre kènne en is toen al vriej sjnel gaon samewone in Bor. Zie zeen greutsje auwers van zoon Joep dae in 2007 is gebaore en van dochter Emma die in 2010 is gebaore. In 2011 zeen zie komme wone in Papenhaove aan de Merovingestraot.
Wilt geer ‘t Prinselikpaar bezeuke of belle? ‘t Prinselik palies is gelaege aan de Merovingestraot 9 in Papenhaove.
Tillefoon Prins: 06 304 467 80
E-mail: r.breuls@bronnebergbreuls.nl
Tillefoon Prinses: 06 290 825 02
E-mail: kimbreuls1811@gmail.com