Kom dat zeen, kom dat zeen! Eine spektakulaire daag in ’t Circus van de Beegter Vastelaovend!

Stap op zaoterdig 11 jannewarie bènne in eine magische waereld van ’t circus en geneet van eine middig en aovend vol meziek, spel en plezeer! De spanning stijgt, want wae zulle de nuj hóaghede waere van de Beegter Vastelaovend 2025? Kom ’t zelf ondekke!

Kènjermiddig (start óm 16:11 oer)
De jóngste Zawpenskes betraeje de piste en laote hun talente zeen – van dans en playback tot ech zènge of ein möpke! Opgaeve kèn via ’t insjriefformuleer welke te vènje is op www.zawpense.nl/kenjermiddig of scan de QR-code hie ónger.

Spesjaal väör de kènjer oet groep 6 en 7
Dit jaor wordt ’t ekstra spannend väör de jonges en maedjes oet Beeg, Papenhaove en Sjipperskirk. Wae zal ’t nuje Jeugprinsepaar waere en wae kump in de Jeugraod. Ouch väör hun is insjrieve mäögelik via www.zawpense.nl/kenjermiddig of QR-code.

Weer kieke oet nao ein kluerriek circus van optraejes en houpe op eine geweldige nieuwe Jeugprins en Jeugprinses! Nao de kènjermiddig is d’r net zao wie väörig jaor tied om ónger genot van ein plaetje van ózze DJ de inwendige miensj get te versterke. De Zawpense zörge hieväör dus geer hoof neet nao hoes te gaon!!!

Vanaaf 19.44 oer – ’t Gróate Circusfiës
Nao de Kènjermiddig wurdt ’t circus omgetoverd tot ein waar fiës. Mit meziek en mitwirking van ónger angere Z.H. Nuchter Vertroch belaof deze aovend ein spektakel vol lol en plezeer te waere. De Iërezawpens en ’t Seniorepaar waere bekendgemaak en de ‘grande finale’ onthult wae ’t Prinsepaar zal zeen väör de Beegter Vastelaovend 2025.

Kom op tied, want dit wulse neet misse! Nao de onthullinge geit ’t fiës door, tot in de late uurkes.

Zet de datum in diene agenda, trek die sjóanste circusoutfit aan en kóm ’t avontuur belaeve!