Prinseoetreuping 2024

Op zaoterdig 13 jannewarie zal tiejes eine extravagante naomiddig en aovond vol spel, zàngk en plezeer bekènd waere welke nuje hóaghede väörop zulle gaon in de Beegter Vastelaovend van 2024. Vanaaf 16.11 oer zal gestart waere mit de Kènjermiddig wo de jongste Zawpenskes de kans kriege om hun denske, playback act, live act, of möpke te kómme väördrage. Opgaeve kèn via ’t insjriefformuleer welke te vènje is op www.zawpense.nl/kenjermiddig.

Väör de jonges en maedjes van groep 6 en 7 van de basissjoal en woonachtig in Beeg, Papenhaove of Sjipperskirk is ’t deze middig extra spannend, wae zal ’t nuje Jeugprinsepaar waere en wae kump in de Jeugraod. Ouch dit insjriefformuleer is te vènje is op www.zawpense.nl/kenjermiddig.

Weer houpe dat weer väöl optraejes en potentiële Jeugprinse en Jeugprinsesse maoge begroete.

Nao de kènjermiddig is d’r net zao wie väörig jaor tied om ónger genot van ein plaetje van ózze DJ de inwendige miensj get te versterke. De Zawpense zörge hieväör dus geer hoof neet nao hoes te gaon!!!

Taege 19:44 oer wurdt de draod weer opgepak en mit mitwirking van o.a. Z.H. De Roepoepers, Z.H. Nuchter Vertroch en diverse Beegse artieste zal deze aovend garant väör väöl meziek, spas en plezeer!! Gedoerend deze aovend zulle de Iërezawpens en ’t Senioreprinsepaar bekènd waere gemaak en tiejes de ‘grande finale’ zal onthuld waere welk Prinsepaar väörop geit in de Beegter Vastelaovend 2024.

Kom op tied, want hie wulse zeker bie zeen!! Aansloetend op ’t Prinsebal kènt tot in de late uurkes gefiës waere.