Prins Timo I & Prinses Sylvie
Prins Timo I is gebaore op 22 december 1996 in Beeg. Bie de gemeinte stuit hae bekènd es Timo Rosita Monica Hermans, mit ‘t sterrebeeld baogsjötter. Prins Timo I is opgegreujd in Beeg same mit zien awwers Ber en Miranda, zös Anne en zösterke Mieke.
Prins Timo I haet op de Pestóar Franksjóal gezaete óm vervolges nao ’t Trevianum in Zitterd te gaon. Wie hae dao klaor waor, is Prins Timo I bie de Sjenge in Mestreech rechte gaon studere.
Nao oetgebreid genaote te höbbe van ‘t studentelaeve besjloot hae dat Beeg toch erg waal good waor en is hae nao ‘t behaole van zien Master fiscaal rech gaw trök gekómme. Sinds 2021 wirk hae bie Deloitte es indirect tax analyst, wo de Prins “lestige” dènger duit mit belastinge.
In ziene vrieje tied speelt de Prins trómpöt bie de Käöninklikke Hermenie Aurora en is hae sinds de oprichting van Z.H. Nuchter Vertroch betrokke bie dees muzikale rouversbende. Prins Timo I kènt d’r ouch ein hobbie van make óm last-minute reize te boeken nao ónbekende wuuj oorde. Daonaeve kènt geer ‘m geregeld langs de Maas zeen wanjele.
Prinses Sylvie is gebaore op 13 jannewarie 1998 in Bor. Bie de gemeinte stuit ze ingesjreve es Sylvie Andrea Jacquelina Knoors mit ’t sterrebeeld steinbók. Prinses Sylvie is opgegreujd in t Reuberiek in Obbeeg, wo zie same mit häör awwers Hub en Nicole, zös Aniek en broor Rens oppe boerderie langs ‘t kanaal woonde.
Prinses Sylvie haet dan ouch op de St. Willibrordussjóal in Obbeeg gezaete wonao ze wujer is gaon liëre in Belsj. Vervolges haet is ze iës verzörgende IG in Zitterd gestudeerd en daonao nog Doktersassistente in Haelder. Sinds 2020 is Sylvie in dees funksie wirkzaam bie de hoesarts in Bor.
In häöre vrieje tied duit ós Prinses träöte op häöre sax biej de Hermenie Concordia en Z.H. Neet te Blaoze oet Obbeeg en same mit de Prins bie Z.H. Nuchter Vertroch. Ouch duit Prinses Sylvie nog handjballe bie de handbalvereiniging in Bor. Es zie dan nog get tied äöver haet duit zie waal ‘ns get bloomstökskes make väör in hoes.
Ós Prinsepaar haet zich 7 jaor geleje biej Nuchter Vertroch liëre kènne. In de nujjaorsnach van 2016 spróng de vónk äöver in ein hónjemanj in ‘t kelderke van femilie Savelkoul. Es zelf beneump sterrekundige haet Prins Timo I, Prinses Sylvie get sjóan sterre in Beeg laote zeen. Sins ein jaor wone zie same oppe Mauritsstraot in Beeg.
Wilt g’r ‘r Prinselik paar ‘ns bezeuke of belle?
Mauritsstraat 7
6127 BV Beeg
Tillefoon Prins 0631135971
E-mail timohermans96@gmail.com
Tillefoon Prinses 0616295431
E-mail Sylvieknoors@gmail.com
Foto: Guido Hahnraths
