Dit is ós Prinsepaar

Prins Marc I is gebaore op 23 september 1986 in de waereldstad Gelaen. Bie de gemeinte stuit hae ingesjreve es Marc Josephina Jacoba Hendrika Savelkoul. Hae is opgegreujd in de Eikenstraot in Beeg wo hae woonde mit zien awwers Ben en Carolien Savelkoul (Prinsepaar 2001).

Prins Marc I haet op bazissjóal Pestóar Franck gezaete, wonao hae nao ’t DaCapo College in Bor is gegange. Nao eine korte tösjestop op ‘t Leeuwenborg is Prins Marc I op het Citaverde College de BBL-opleiding Vakbekwaam Hovenier gaon volge en daonao Manager Natuur en Leefomgeving. De kombinasie wirk en sjóal vónj hae ideaal.

Zien iërste ervaring in het greun haet hae opgedaon bie ènkele kleine hoveniersbedriefkes. Oeteindelik haet hae 6,5 jaor bie Tuintechnisch Hoveniersbedrijf Queisen in Maerse gewirk en is noe al bienao 10 jaor Väörman A bie Dolmans Landscaping Group, vestiging Monsdal Mestreech. Sins kort is hae bènne dit bedrief begoos aan ein traineership tot Oetveurder.

De gróatste hobby van Prins Marc I is meziek make en speelt mit väöl plezeer al hiël get jaore sjuuf. Prins Marc I volgde de meziek opleiding bie Käöninklikke Hermenie Aurora en is dan ouch al mië es 25 jaor lid van dees vereiniging. Momenteel is hae aktief es straotmuzikant en hulp af en toe ens oet bie ein konsert. Daonaeve speelt hae ouch nog bie ós hofkapel Daag & Nach, Z.H. de Roepoepers, Big Band Beeg en Die Himmlische Heinies.

Prinses Marloes is gebaore op 27 september 1989 ouch in Gelaen. Bie de gemeinte stuit zie ingesjreve es Marloes Hubertina Johanna Wijshoff. Prinses Marloes is ein dochter van Piet en Jolanda Wijshoff (Prinsepaar 2004) en haet eine awwere broor Peter. De Prinses is opgegreujd op de Sjóalstraot en later nog op de Houtstraot in Beeg.

Prinses Marloes haet ouch op bazissjóal Pestóar Franck gezaete, daonao haet ze de HAVO gedaon op ’t Trevianum. Vervolges ging zie in Zitterd nao Hóagesjóal Zuyd wo zie de opleiding Social Work volgde en aafstudeerde es Sociaal Pedagoog.

Vanoet häör stage kreeg Prinses Marloes in Kirkraoj in ’t jeug- en jóngerewerk in 2010 ein baan aangebaoje. In 2015 maakte zie de äöverstap nao de jeugzörg en haet ze bie de gemeinte Kirkraoj gewirk es Jeugkonzulent. Nao jaore in Parkstad te höbbe gewirk vónj de Prinses ’t in 2021 tied väör get anges en is ze es pedagogisch coach en beleidsmedewerker in de kènjeropvang gaon wirke bie Wee-Play Kinderopvang.

In de vriejen tied is zie drök mit de kènjer, geit ze gaer ein stök wanjele en probeert häöre kondisie bie Reshape op peil te hawte. Es d’r dan nog get tied äöverblif is de Prinses gaer kreatief bezig mit punnike en iezerdraod. Tot slot maak ós Prinses ouch meziek, zie is al ruum 25 jaor lid van Hermenie St. Cecilia en speelt dao op dit moment es straotmuzikant klarinet.

Ós Prinsepaar haet zich op de vriedigaovend nao de repetities van de hermenië liëre kènne bie Kaffee Aurora. Óngertösje zeen ze al ruum 17 jaor biejein. In 2010 zeen ze op de Willem I straot in Beeg gaon samewone. In 2013 zeen ze getrouwd in de kirk van Beeg. Ze höbbe 3 dochters, hun sterrekiendje Suus* (2014), Saar van 8 jaor en Eef van 6 jaor. Saar en Eef zeen beide harstikke gek van de Vastelaovend. Sinds 2016 woont ’t Prinsepaar in de Stiftstraot in Papenhaove, in ’t hoes van de opa en oma van de Prinses (Seniorepaar 2007).

Wilt g’r ‘t Prinselikpaar bezeuke of belle? ‘t Prinselik palies is gelaege aan de Stifstraot 8 in Papenhaove.

Tillefoon Prins: 06 12 87 65 04

Email : marcsavelkoul@gmail.com

Tillefoon Prinses: 06 55 92 42 94

Email : marloes_wijshoff@hotmail.com