Nuuj Heersers V.V. De Zawpense Beeg 2023
Op zaoterdig 14 jannewarie woorte in de Zawpensetempel Oos Hoes nao drie prinsloze jaore eindelik weer nuuj hóaghede van ’t Zawpenseriek bekènd gemaak. In taegestelling tot iëdere jaore, wobie ’t oetrope van de Prins op zaoterdig en de kènjermiddig op zónjig plaatsvónje, höbbe de Zawpense d’r dit jaor väör gekaoze óm alle Prinselikke aktiviteite op eine daag te organizere.
’t Dekaor väör deze aovend woort ómgeboewd tot ein Sljagerparade wo ’t road, gael en greun efkes plaatsmaakde väör jaore ’70 oranje en broen. Oet ’t lèste spelsjow-kufferke kaome oeteindelik de name van ’t Prinsepaar teväörsjien.
Prins Timo I (Hermans) dae es 46ste Prins van V.V. De Zawpense Beeg zal regere, is in ’t dagelikse laeve indirect tax analist bie Deloitte. De Prins is lid van Käöninklikke Hermenie Aurora en same mit de Prinses aktief bie Z.H. Nuchter Vertroch. In ziene vrieje tied geit de Prins ouch gaer op zeuk nao vekansies nao wuuj ónbekènde oorde en maak hae regelmaotig ein wanjeling langs de Maas.
Prinses Sylvie wirk es doktersassistentie bie de hoesarts in Bor en naeve Z.H. Nuchter Vertroch is zie ouch lid van Hermenie Concordia en Z.H. Neet te bloaze oet Obbeeg. Es de Prinses nog tied äöver haet geit ze gaer handjballe en maak ze bloomstökskes väör in hoes.
Dezelfde aovend woort ouch Senioreprinses Maria Lechner oetgerope. Senioreprinses Maria is al jaore es vriewilliger aktief. Iës es leshulp op sjóal, klaoräöver brigadier en ‘t organizere van ’t jeugzwömme, mer later ouch es aktief hulpverlener en bestuurslid bie de EHBO-vereniging Grevenbicht-Papenhoven.
De titel van Iërezawpens is dit jaor väör Bea van Es. Bea zèt zich al jaore in väör versjillende initiatieve in Beeg. Ze is o.a. väörzitter van buurtvereiniging de Maaskantj, aktief bie ’t Sinterklaoskommitee, nump ze plaats es lid van de zjurie tiejes de Kènjermiddig en haet ze in diverse aktiviteitekommissies plaatsgenómme op bazissjóal de Kingbeek. Sinds ein aantal jaore organizeert ze same mit de Beegter Bleumkes de vrouwluujzitting, welke ouch dit jaor weer ein knallend fiës belaof te waere.
De jeug zal dit jaor väörgegaon waere door Jeugprins Raf (Francot) en Jeugprinses Stella (Demandt). Jeugprins Raf en Jeugprinses Stelle zitte allebei in groep 7 van basissjóal de Kingbeek in Beeg en staon te trappele óm Vastelaovend te viere.
Alle hóagwaardigheidsbekleijers zulle resipiejere op zoaterdig 11 fibberwarie aanstaonde en waal in de Zawpensetempel Oos Hoes. Aanvangstied is 19.00 oer.
