Nuje hóaghede V.V. de Zawpense Beeg 2026 bekendgemaak
Nuuj hóaghede V.V. de Zawpense Beeg 2026 bekèndgemaak
Op zaoterdig 10 jannewarie waor Zawpensetempel Oos Hoes ’t staolend toneel van ein spetterende, sjoemende en fiëstelikke ónthulling van de nuuj heersers van ’t Zawpenseriek. De bühne woort ómgetouverd tot ein badkamer vol mit bubbels, stoum, spegels. D’r passeerde tal van oetbundige en kluerrieke figure die ’t publiek mitnómme in ein broesjend spektakel.
Prins Denny I en Prinses Sandra
Prins Denny I (Demandt) zal es 49ste Prins van V.V. de Zawpense Beeg in 2026 regere äöver ’t Zawpenseriek. In ’t dageliks laeve is Prins Denny I aannummer en haet hae zien eige bedrief Denny Demandt Bouw, hae hult zich daonave gaer bezich mit ‘t óngerhawte van hun hoes en tuin. De Prins hult van gezelligheid, kaoke en lekker aete. Hae geit gaer nao ’t voetballe van hunne zoon kieke en af en toe ein pilske pakke mit de wageboewers.
Prinses Sandra (Demandt-Offermans) wirk bie Wonen Limburg es Manager van de aafdeiling Strategie, Beleid & Publieke Waarde. In häöre vrieje tied is de Prinses gaer bezig mit de kènjer en vundjt ze ’t fantasties dat häör dochters häör vreugere hobby paerdrieje höbbe äövergenómme. Es d'r dan nog get tied äöverblif geit de ze sjoppe, op stap mit vriendinne of gewuen eine gezellige aovend toes organizere, wat zie altied super gezellig vundjt!
’t Prinsepaar is woonachtig in de Mik en de awwers van Stella, Joris en Milou, die gruetsj zeen en ’t harstikke sjiek vènje dat pap en mam noe väörop maoge gaon in de Beegse Vastelaovend 2026. Same zeen ze bie de Vastelaovesgroep “Gewuen omdat ‘t kènt”, wo zie al jaore mitloupe in de Gróate optoch op Vastelaovesmaonjig. Jeder jaor verrasje zie weer mit prachtig gemaakde pakke en wages.
Senioreprinses Lies
Ózze Senioreprinses dit jaor is nemes minder dan Lies Salden-Bours, geboare op de Peperstraot in Beeg. De Senioreprinses greujde op in ein werm en laevendig gezin róndom kaffee ‘t Vaerhoes. Mit häör gróate leefde Thé Salden boewde ze ein laeve vol motorreize, vrundjschappe en vastelaovend op. In hun zelf geboewd hoes aan Lènjestraot woonde ze same mit hun twië zone Guido en Edwin. Senioreprinses Lies is lid van TC Bicht '14 en haet bie Vouershof in Gelaen gewirk en geneet noe van häör pensioen, veer kleinzone en bonuskènjer. Nao ‘t plotselinge verlees van Thé vónj ze, gesteund door femilie, vrunj en ‘t rieke vereinigingslaeve in Beeg opnuuj krach óm noe, mit Thé als besjermèngel op häör sjouwers, ram gruetsj en vol entoezjasme väörop in de polonaise door ‘t Zawpenseriek es Senioreprinses 2026 te gaon.
Iërezawpens Dennis
De titel Iërezawpens geit dit jaor nao Dennis Lebens. Dennis is al mië es 25 jaor dirigent van de jeughermenie van Käöninklike Hermenie Aurora en hae is daormit väör väöl jóng muzikante ’n echte inspirasiebron. Dao bie is hae muzikaal leider van ós Hofkapel Daag & Nach, wo hae mit zien entoezjasme en vakmanschap ederein mit wèt te kriege. Sins de oprichting in 2023 is hae daobie mede-dirigent van ’t Nuuj Talent Orkès Maasvallei, womit hae zich blif inzètte väör ’t wujer óntwikkele van muzikaal talent in ós regio. Mit zien gróate betrokkenheid en leefde väör de muziek is Dennis mië es verdeend óntvanger van de titel Iërezawpens.
Jeugprinsespaar Nout en Veerle
De jeug zal dit jaor väörgegaon waere door Jeugprins Nout (Helgers) en Jeugprinses Veerle (Moret) Jeugprins en Jeugprinse zitte allebei in groep 7 van Bazissjóal de Kingbaek en kènne neet wachte óm Vastelaovend te viere. Zaowaal Nout en es Veerle höbbe de Vastelaovend mit de paplaepel ingegaote gekrege. Ze gaon al vanaf de kènjerwage mit en viere al jaore Vastelaovend. Ze höbbe zelfs Prinse en Prinsesse in de femilie. In hunne vrieje tied spele ze gaer mit vriendjes en vriendinnetjes, voetbalt Nout bie SV Argo en speelt Veerle trómpöt bie Hermenie St. Cecilia en danst bie dansvereiniging Flashdance in Obbeeg.
Jeugprins Nout en Jeugprinses Veerle kènne zich al vanaaf kleins aaf aan. Ze maakde same meziek, lepe same mit mit de taptoe en zitte al twië jaor in dezelfde klas. Dat zie noe same Jeugprins en Jeugprinses zeen maak ’t ekstra biezunjer en ekstra gezellig.
Resepsie hóagwaardigheidsbekleijers
De offisjele resepsie van de nuje hóagwaardigheidsbekleijers zal plaatsvènje op zaoterdig 7 fibberwarie 2026 om 19.11 oer in de Zawpensetempel Oos Hoes.
Mië weite äöver ós hóaghede? Kiek dan väör eine oetgebreidere kènnismaking op www.zawpense.nl