Nuje hóaghede V.V. de Zawpense Beeg 2025 bekendgemaak


Nuje hóaghede V.V. de Zawpense Beeg 2025 bekendgemaak
Zawpensetempel Oos Hoes waor zaoterdig 11 jannewarie 2025 ’t dekor väör eine magische en vurige onthulling van de nuje heersers van ’t Zawpensriek. De bühne woort omgetouverd tot ein laevendig circus mit markante en kläörrieke figure.
Prins Rob I (Breuls) zal dit jaor es 48ste Prins van V.V. de Zawpense Beeg regere in ’t Zawpensriek. In ’t dageliks laeve is hae advokaot bie Bronneberg Breuls Advocaten en ein väölzijdig persoon: van jage en trompet/jaghoorn tot klusse en tuinere. Prins Rob I is bestuurslid bie Sjötterie Eendrach en haet mit dees vereiniging es väöropsjöt ’t OLS in 2013 weite te wènne.
Prinses Kim (Breuls-Evers) wirk es bènnedeens verkouper bie L&P in Gelaen. In häöre vrieje tied geit ze gaer op stap, is ze sikkretaris bie die opleidingscommissie van Hermenie St. Cecilia en bie ’t Trevianum is zie te vènje es lid van de klankbordgroep. Es d’r dan nog tied äöver is hulp zie de Jeugdrumband Awt gemeinte Bor mit alles wat ze nuedig höbbe.
’t Prinsepaar zeen trotse awwers van Joep (17) en Emma (14), die beide dool zeen op meziek make en de Vastelaovend.
De iër om ’t Senioreprinsepaar 2025 te vorme is dit jaor weggelag väör Wil en Monique (Hermans-Barten). Senioreprins Wil en Senioreprinses Monique höbbe joare langk bie de Rabobank gewirk en zeen noe mit pensioen. Ze genete van hunne vrieje tied, reize gaer en vervulle óngertösje hun nuje rol es opa en oma. ’t Senioreprinsepaar stuit te trappele om väörop te goan in de polonaise.
De titel Iërezawpens is dit jaor verdeend door nemes mit dan Sjaak (Pörteners). Sjaak zet zich al jaorelangk in väör diverse initiatieve in Beeg en omstreke. Zao is hae inmidels al gerume tied kaartrekker bij de commissie die eder jaor zörg väör eine prachtige Processie op Pènkstermaonjig. Ouch awt-oetbater van ’t inmiddels geslaote kaffee de Kestanjeleboum, awt-lid van Broedersjap van de Beegter Wulisse, bestuurslid bie de Zonnebloem (afdeiling G.O.P.S) en actief vriewilliger bie Stichting Oos Hoes, maoge neet op ’t lieske ontbraeke. Ziene inzet en betrokkenheid make van häöm eine welverdeende titelhawwer.
De jeug zal dit jaor väörgegaon waere door Jeugprins Robin (Pennings) en Jeugprinses Amber (Stelten). Jeugprins Robin en Jeugprinses Amber zitte beide in groep 7 van Bazissjóal de Kingbaek in Beeg en kènne neet wachte om Vastelaovend te viere.
De offisjele resepsie van de nuje hóagwaardigheidsbekleijers zal plaatsvènje op zaoterdig 22 fibberwarie 2025 om 19.11 oer in de Zawpensetempel Oos Hoes.
Mië weite äöver ós hóaghede? Kiek dan väör eine oetgebreidere kènnismaking op www.zawpense.nl