Op vriedig 17 fibberwarie wurdt op Bazissjóal de Kingbeek vastelaovend gevierd. Väör de invulling is ein samewirking op touw gezat tössje ’t vastelaovescómité van Bazissjóal de Kingbeek, CV De Reube oet Obbeeg en VV De Zawpense oet Beeg. Dees samewirking is óntstange, ómdat de jeug oet de beide dörpe vertegenwoordig is op Bazissjóal De Kingbeek. ’t Doorgaeve van de vastelaovestradisie wurdt gestimuleerd door alle betrokke partieje. Dit beteikent dat ouch dit jaor weer VV De Zawpense en CV De Reube in de optoch aanwezig zeen.

Van 11.00 tot 12.00 oer zal eine bóntje stoet door de straote van Beeg trèkke. Startpunt is ’t St. Catharinaplantsoen wonao de optoch ziene weag vervolg via de Houtstraat, Lindenstraat, Dr. Duijsenslaan, Thorbeckestraat, Raadhuisstraat, Boulevard, Nieuwstraat en tenslotte weer ’t St. Catharinaplantsoen. Aansloetend organiseert Gemeinsjaphoes Oos Hoes vanaaf 12.30 oer weer ein Kènjerbal.