Kènjeroptoch 2020
Op vriedig 21 fibberwarie wurdt op Bazissjóal de Kingbeek vastelaovend gevierd. Väör de invulling is ein samewirking op touw gezat tössje ’t vastelaovescómité van Bazissjóal de Kingbeek, CV De Reube oet Obbeeg en VV De Zawpense oet Beeg. Dees samewirking is óntstange, ómdat de jeug oet de beide dörpe vertegenwoordig is op Bazissjóal De Kingbeek. ’t Doorgaeve van de vastelaovestradisie wurdt gestimuleerd door alle betrokke partieje. Dit beteikent dat in taegestèlling tot anger jaore neet allein de hóaghede en jeugraod van VV De Zawpense in de optoch aanwezig zeen, mer ouch de hóaghede van CV De Reube inklusief hun dansmariekes.
De daag start óm 9:00 oer mit ’t aanbeje van spek mit eier aan de wènnaar van de knutselopdrach door CV De Reube. Vanaaf 10:00 oer zulle alle kènjer mit hun eigen klas in gymzaal ‘Bicht’ hun vastelaovesoptraeje aan de hóaghede van de Reube en Zawpense prezentere. Van 11:00 tot 12:00 oer zal eine bóntje stoet door de straote trèkke. Dit jaor truk de optoch door de straote van Beeg en in 2021 door de straote van Obbeeg. Uiteraard houpe weer op beide lokasies publiek oet allebei de dörper te treffe! Startpunt is ’t St. Catharinaplantsoen wonao de optoch ziene weag vervolg via de Houtstraat, Lindenstraat, Dr. Duijsenslaan, Thorbeckestraat, Raadhuisstraat, Aan de Greune Paol, Nieuwstraat en tenslotte weer ’t St. Catharinaplantsoen. Aansloetend organiseert Gemeinschapshuis Oos Hoes vanaaf 12:00 oer weer ein Kènjerbal mit ballonneclowns en ein gratis traktasie väör alle kènjer.
