Jeugprinsepaar Bas & Jet

Dit is ós Jeugprinsepaar

Jeugprins Bas (Meuwissen) is 10 jaor en is de awste zoon van Roy en Wendy Meuwissen – van Didden. Hae haet nog ein jónger breurke Sem dae 7 jaor is. Sins 2020 woont Jeugprins Bas same mit zien pap en mam in het Peerlinkeriek van Illekaove en zit in groep 7 van bazissjóal de Kingbaek in Beeg.

De gróatste hobby van Jeugprins Bas is voetballe en läöt hae zien kunste gaer zeen in de JO-11 op ‘t veld bie voetbalclub DVO in Zitterd. Daonaeve duit Jeugprins Bas trómme bie Käöninklikke Hermenie Aurora en mist d’r geine eine thoeswedstrijd van Fortuna, wo d’r same mit Pap en Sem haer geit.

Es Jeugprins Bas gein verplichtinge haet mit trómme of voetballe, dan geit haet ‘t leefste game mit zien vrunj. Zóa gaw ‘t good waer is, is d’r mit zien breurke achter in de wei in Illekaove te vènje, wo zie dan uiteraard same aan het voetballe zeen.

Jeugprinses Jet (de Clercq) is 10 jaor en de awste sjnaak thoes. Zie woont same mit pap, mam, zösterke Wies en breurke Tuur oppe Houtstraot, nómmer 26. Ouch Jet zit in groep 7 van bazissjáol de Kingbaek in Beeg.

In de vriejen tied maak Jeugprinses Jet gaer meziek. Ze speelt dwarsfluit bie de Käöninklikke Hermenie Aurora, wo zie same mit Jeugprins Bas op zónjigmörge bie de jeughermenie flink aan ‘m gaon. Daonaeve is Jet lid van de jeug van heemkunde vereiniging “Bicht”. Es zie dan nog tied äöver haet is ze gaer bezig mit de hanj; technische lego boewe en kreatieve frutsels make. Ouch spelkes spele duit ze óntzettend gaer en vol äövergave, ze is d’r op gebrend óm te wènne! Uiteraard duit ze dit allemaol ‘t leefste mit häör vriendinne, wo ze es ’t efkes geit mit aafspruk.

Jeugprins Bas en Jeugprinses Jet viere al jaore Vastelaovend in ’t Zawpenseriek en zie höbbe allebei hiël väöl zin óm same mit alle hóaghede en alle Zawpense d’r eine te gekke Vastelaovend van te make!