Gruetsj prezentere weer ós straolende Jeugprinsepaar van 2026: Jeugprins Nout en Jeugprinses Veerle!

Jeugprins Nout is gebaore op 17 november 2014 in ’t ziekehoes van Zitterd-Gelaen en woont aafwisselend bie zien mam en Rob oppe Sjóalstraot, en oppe Kuppelkovenderstraot bie ziene pap Arno. Hae haet eine gróate broor, Tuur, dae noe ouch volop kènt mitgenete van alle Vastelaovesspjas. Nout is dèk te vènje op ’t voetbalveldj van S.V. Argo – d’r zeen waal mië hobbies väörbiegekómme, mer voetballe blif toch zien gróate favoriet. Mit hapjes, tosti’s en pizza maak se häöm altied blie en op de fits geit hae altied op zeuk nao vrunj óm same lekker Beeg ónveilig te make.

De Vastelaovend zit Nout dudelik in ’t blood. Hae is eine achterkleinzoon van de alleriëste Prins van de Zawpense: Prins Pierre I, zien nich Inge waor in 2004 Jeugprinses, ziene opa John Iërezawpens in 2010 en es dat nóg neet genóg is, waor zien pap en mam precies 20 jaor geleje in 2006 gróate Prins en Prinses. Dus mit rech, mit de paplaepel ingegaote.

Jeugprinses Veerle (Moret) is gebaore op 4 oktober 2014, ouch in ’t ziekehoes van Zitterd-Gelaen. Veerle woont same mit häöre gruetsje pap Kevin, mam Debbie en breurke Ruben oppe Kuppelkovenderstraot. Häör iëste kènnismaking mit de Vastelaovend waor alle in ‘ne kènjerwage tiejes de optoch in Bor, en vanaaf toen is ze neet mië te stoppe. Jeder jaor optochte kieke, fiëste in de zaal, lekker danse en sprènge mit vriendjes en vriendinnetjes. Dao geneet zie ram van.

Veerle is eine echte sprèng-in-‘t-veldj en danse is häör gróate passie. Al vanaf häör driede dans ze bie dansvereiniging Flashdance in Obbeeg. Same mit de meide oet de Jeugraod van 11 traent ze jedere zaoterdig in de gymzaal van de bazissjóal, mit es hóagtepuntj jeder jaor twië sjóan optraejes wo ze gruetsj op is. Daonaeve is Veerle ouch muziekaal. Ze is lid van Hermenie St. Cecilia, wo ze is begoos op blokfluit en sinds häör zevende speelt ze trómpöt. Jedere dónderdig geit ze troe nao de trómpötles en op vriedig is ze te vènje bie ’t JEC in Oos Hoes om same meziek te make.

Jeugprins Nout en Jeugprinses Veerle kènne zich al vanaaf kleins aaf aan. Ze maakde same meziek, lepe same mit mit de taptoe en zitte al twië jaor in dezelfde klas. Dat zie noe same Jeugprins en Jeugprinses zeen maak ’t ekstra biezunjer en ekstra gezellig.

Same mit hun adjudante Juul en Yenthe, de Jeugraod van 11, de gróate Raod van 11, alle Hóaghede, de Iërezawpens en alle kènjer van de Rv11 belaof ’t ein kort mer krachtig en väöral geweldig Vastelaovessezoen te waere.

’t Jeugprinsepaar reup alle boefjes, femelieleje en gans Beeg op óm same te fiëste, te sprènge en te zènge. Dan make weer d’r same eine knallende Vastelaovend van!

Zawpense Alaaf! Alaaf! Alaaf!