Jeugprinsepaar 2025: Robin Pennings & Amber Stelten


Jeugprinsepaar 2025: Robin en Amber
Gaer prezentere weer uch gruetsj Jeugprins Robin (Pennings) en Jeugprinses Amber (Stelten).
Jeugprins Robin Pennings
Gaer prezentere weer uch gruetsj Jeugprins Robin (Pennings). Jeugprins Robin is gebaore op 11 december 2013 ónger ’t sterrebeeld Baogsjötter, in zien awwerlik hoes aan de Steinwaeg in Beeg. Inmiddels is hae 11 jaor en op 11 jannewarie oetgerope es Jeugprins bie de Zawpense. Dat maog gein toeval zeen, want dat biezunjere getal 11 liek ‘m waal op ’t lief gesjreve.
Vastelaovend is Jeugprins Robin mit de paplaepel ingegaote. Same mit papa Dennis, mama Karin en ziene broor Sten viert hae al jaore Vastelaovend mit vrunjegroep ‘Gewuen omdet ‘t kènt’. Eder jaor loupe zie mit in de optoch in Beeg. De väörbereidinge en deilname zörge väör nog mië Vastelaovessjpas. Väörig jaor haet de Jeugprins zich same mit twië vrunj stiekem opgegaeve väör ein optraeje in de kaffee. Zóa is hunne naam óntstange ‘De Stiekemers’. Ze zènge en danse mit väöl plezeer, ’t leefste mit eine echte mikrofoon in de hanj.
Jeugprins Robin kènt Jeugprinses Amber al van jóngs af aan. Ze speelde jaorelangk same in de zandjbak en belaefde väöl plezeer bie kènjerfiëskes, boete spele en mitgaon nao de judolesse van de Jeugprinses.
Op bazissjóal De Kingbaek koos Jeugprins Robin al ‘ns väörpreuve van ’t prins-zeen wie hae Kleuterprins woort. Destieds stóng Kleuterprinses Nikki aan zien zie. Hae houpte óajt nog ‘ns prins te waere, mer haw hae neet verwach noe es Jeugprins in de polonaise väörop te maoge gaon. Hae vundtj ’t fantasties! ALAAF!
Naeve dat Robin ziene pap, mam en broor gaer bezighult, haet hae nog väöl anger hobby’s. De Jeugprins is gaer bezig in de käöke, geneet van drumlesse bie Dirk van Hometown en is mer leefs drie kiër per waek te vènje op ’t voetbalveldj bie S.V. Argo. Dit sezoen stuit hae ónger de lat es keeper en duit hae same mit zien team en trainers zien uterste bès óm ‘t de taegestanjers ’t zóa lestig mäögelik te make.
Noe rich Jeugprins Robin ziene volle aandach oppe Vastelaovend. Want, zóa es hae ’t zaet, “Dees kans krig se mer eine kiër!”. Same mit de Zawpense, Jeugprinses Amber, Adjudante Rik en Liz, de Raod van 11, alle angere hóaghede en uch allemaol, wilt hae dit fiëske ónvergaetelik make. Houpelik viert geer gezellig mit Jeugprins Robin mit.
Zawpense! Alaaf, Alaaf, Alaaf.
Jeugprinses Amber Stelten
Mit trots prezentere weer uch Jeugprinses Amber (Stelten). Jeugprinses Amber is gebaore op 1 jannewarie 2014, eine sjóane en biezunjere daag, ónger ’t sterrebeeld Steinbok. Dit maakte van häör ’t alleriëste nujjaorskèndj van dat jaor in de gemeinte van Sjtadsvastelaovesvereniging D'n Uul in Remunj.
De Jeugprinses woont same mit pap Léon, mam Esther en breurkes Thijn en Cass, die häör in alles steune, sinds 2017 in Beeg. Häör breurkes zeen hartstikke trots op gróate zus en volge häör dan ouch vol bewonjering in alles wat ze duit.
Jeugprinses Amber haet al van jóngks aaf aan geliërd wat ’t is om Vastelaovend te viere. Wie ’t gezin in Beeg is kómme wone, is ze begonne bie Kènjeropvang Handj in Handj, wo ze väöl vrunj haet gemaak. ’t Is dao wo zie väör de iëste keer in aanraking is gekómme mit de kläörrieke tradisies van de Vastelaovend. Later, wie ze op bazissjóal De Kingbaek zaot, is ouch zie Kleuterprinses maoge zeen. Dao haet zie volop van genaote.
Jeugprinses Amber hult val knutsele en is vaak te vènje aan de knutseltaofel, wo zie häör kreatieve ideeën tot laeve brungk. Daonaeve hult de Jeugprinses van op vekansie gaon, boete spele en aafspraeke mit vrunj en BFF Noë. Mit de Vastelaovend is ‘t Jeugprinses Amber dae väöraan stuit. Ze hult dan alles oet de kas en duit zich schminke, verkleije en optraeje. Deze tied van ’t jaor vungk ze fantasties en ze geneet d’r van.
De jeugprinses dans bie N’dance in Deetere en is vaak vènje in de dojo bie de judoklup EJC in Beeg.
Ós Jeugprinses is eine enorme fan van panda’s en haet de druim om op eine daag in ‘t ech dees dere te maoge verzörge.
Zawpense! Alaaf, Alaaf, Alaaf.