Jeugprins Raf (Francot) is 11 jaor, de jongste toes en woont same mit pap Tom, mam Kim en twiëlingbroor Bram, dae 3 minute awwer is, oppe Deelemanstraot nömmer 1.
Jeugprins Raf duit mit regelmaot ein nuetje krake op ziene saxofoon en speelt bie Hermenie St. Cecilia. Daonaeve is hae ouch väöl op ’t voetbalveld te vènje, es rots in de verdediging speelt hae bie JO11-1 van S.V. Argo. Ouch spruk hae gaer aaf mit zien vrunj en vriendinne. Natuurlik kènt game en TikTok kieke neet ontbraeke in zien lieske mit hobbies.
Jeugdprinses Stella (Demandt) is 10 jaor, de awste toes en woont same mit pap Denny, mam Sandra, breurke Joris en zösterke Milou in de Mik op nömmer 4. Jeugdprinses Stella is gek op paerdrieje en is eder waek es eine waore amazone te vènje bie paerdje Yessie. Zie is eine krea bea, mer in ’t weekend geit ze ’t leeftste op stap of äörges sjoppe. Natuurlik wurt ouch regelmaotig mit vriendinne aafgespraoke, soms verangert ze in eine vlogger en waere de nuedige TikTok denske en filmkes gemaak.
Jeugprins Raf en Jeugprinses Stella viere al jaore Vastelaovend in ’t Zawpenseriek, same mit de groep Gewuen ómdat ’t kènt. Zie höbbe d’r allebei hiël väöl zin en gaon same mit hun adjudante, de raod en alle anger hóaghede d’r eine té gekke Vastelaovend van make!
Foto: Guido Hahnraths
