Ózze Iërezawpens van 2026 is Dennis Lebens, gebaore en getaoge in Beeg op 8 september 1975 en hae is eine zoon van Jo en Betty Lebens en broor van Patrick.

Dennis greujde op in Beeg en waor in zien jóng jaore lid van väöl Beegse vereiniginge. Op 7 jaorige laeftied begoos hae bie Käöniklikke Hermenie Aurora, wo hae nog altied aktief es klarinettist mitspeelt. Daonaeve is hae jaorelangk lid gewaes van de drumband. Ouch deeg de Iërezawpens 10 jaor judo en haet d’r nog ein blawwe maonjig getennis. Wie sjötterie Eendrach in dae tied geine drumband mië haw, haet hae hie ouch oetgehólpe. Regelmaotig lepe ze mer mit 2 man väörop.

Nao ’t konzervatorium haet Dennis zich volledig op de meziek gerich, van lesgaeve tot ’t gaeve van sjóan konserte, van Heineken Night Live in Ahoy tot opera’s in Wiërt.

Nao 10 jaor in Zitterd te höbbe gewoond, verhoesde hae weer trök nao ’t vertroewde Beeg, in dezelfde straot es wo hae is opgegreujd. Inmiddels is hae bienao 13 jaor getrouwd mit Elvira en gruetsje pap van 2 kènjer: Yente (11) en Boet (9).

Taegewoordig is de Iërezawpens nog ummer aktief es docent en dirigent van versjillende orkeste. Natuurlik bie de jeughermenie van Aurora, mer ouch in Born en Budel, en bie ’t Nieuw Talent Orkest van Beeg en Obbeeg. Mit dees orkeste zeen al sjóan konserte gegaeve en gooj rezultate gehaold. Daonaeve wurdt ózze Iërezawpens regelmaotig gevraog es invaller, väör ’t gaeve van workshops of ’t verzörge van partierepetities bie versjillende orkeste.

Es vas lid bie Aurora en Daag en Nach prebeert hae zóaväöl wie mäögelik mit te spele. Wujer haet Dennis zien eige kapel, de “Mährländer”, wo väöral Mährische en Boheemse blaosmeziek sentraal stuit.

’t Is väör ózze Iërezawpense Dennis ein gróate iër óm deze titel te drage. Hae kik d’r enorm nao oet óm deze Vastelaovend same mit de anger hóaghede te belaeve. Ekstra biezunjer is ’t dat hae dit same maog mitmake mit zien dochter Yente, adjudant van de Jeugprinses. Same gaon zie d’r eine ónvergaetelikke Vastelaovend van make.