Aan alle inwoners van ós Zawpenseriek

De vastelaovend zit d'r weer op. De sjlingers zeen aafgepak, de ballonne zeen opgeruimp en de vastelaovespekskes zeen weer opgeborge väör 't volgend jaor.

'T is ós eine iër gewaes óm dit jaor names vastelaovesvereiniging de Zawpense väörop te maoge gaon mit de vastelaovend.

'T waor väör ós allemaol ein fantastiese ervaring en weer höbbe stök väör stök genaote van uch entoezjasme, orriginaliteit en muzikaliteit deze vastelaovend.

Weer veulde ós op hanj gedrage en höbbe mit bewónjering gekeke wie de vastelaovesvierders van Beeg, Papenhaove en Sjipperskirk vief daag lank mit ós mit höbbe gedaon. Van väör nao achter en van lènks nao rechs. Dèks tot in de late uurkes höb geer mit ós gesprónge, gezónge, gefiës en meziek gemaak.

Ouch dit jaor troch weer eine prachtige optoch door de straote. 'T waor sjóan óm te zeen dat zóa väöl gróate, klein groepe en einzelgängers zóa entoezjas van jónk tot awt mit lepe en danste.

Dao maoge weer es dörp gruetsj op zeen. Bedank dao väör!

Weer wille ouch de Zawpense bedanke väör de organizasie van de vastelaovend en de ónvermeujbare inzat óm de Vastelaovend eder jaor weer tot ein sukses te make. 'T wurdt ouch erg gewaardeerd dat de kaffees in Beeg, ós en alle Vastelaovesvierders, höbbe bedeend en werm höbbe óntvange.

Daonaeve höbbe weer genaote van de versjillende optraejes mit die daag wo bie groepe zich samegepak höbbe óm de Vastelaovend in Beeg, same, nog sjóaner te make.

Names de hóagwaardighede van 2025 bedank en tot kómmend sezoen! Zawpense Alaaf

Prins Rob I
Prinses Kim
Jeugprins Robin
Jeugprinses Amber
Senioreprins Wil
Senioreprinses Monique
Iërezawpens Sjaak