Fons Jennen beneump tot Senator van De Zawpense!

Op Vastelaoveszaoterdig stuit tradisjineel de Róndjgank en ’t dinere mit de Prins op ’t program. Helaas vanwaege COVID-19 höbbe weer dit jaor gein hóagwaardighede kènne oetrope, mer dat haet ós d’r neet van weerhawte óm geine Róndjgank en ’t dinere zónger Prins te verzörge.

Ónger ein strakke blaw loch en straolend zunke trochte de Zawpense same mit Hofkapel Daag & Nach door de stroate van Beeg. Normaal gespraoke gaon weer alle hóagwaardighede ophaole, mer dit jaor veel deze iër te bäört aan Fons Jennen. Fons haet te kènne gegaeve óm nao 34 jaor gekostumeerd lid te gezeen gewaes van de Rv11 te gaon stoppe. Weer wólle Fons daorom ‘ns in ’t zunke zètte.

Fons is op 27 april 1987 toegetraoje es lid van de Rv11. Destieds ónger aanveuring van Thieu Stauder, vanaaf 1990 ónger Frank Hermans en sins 2016 ónger Pascal de Vries. Vanaaf 9 mei 1987 t/m 11 november 2000 (13 jaor) is Fons sikkretaris gewaes en vanaaf dae tied beheert hae ouch al ’t volledige archief van al ós beeldmateriaal (dia, foto’s en beeldopnames).

In 2002 woort bie de Kestanjeleboum nao Rv11 vergadering de “Zawpense Zoep Raekening” (ZZR) opgerich. Vanaaf dees oprichting t/m októaber 2021 (bienao 20 jaor) haet Fons dit tot in de puntjes beheerd.

Es awt gedeende haet hae dèk rech van spraeke es hae ein pozitieve kritische nóat läöt huere. Weer wardere dat hiël erg. Daonaeve is Fons ummer de helpende handj bie tal van aktiviteite bènne de Zawpense.

T ’t dageliks bestuur van Vastelaovesvereiniging de Zawpense haet daoróm beslaote óm Fons te beneume tot Senator van De Zawpense!

Fons, nogmaals perfisiat en weer wille dich bedanke väör 34 sjóan jaore en houpe nog väöle jaore op diene steun en toeverlaot te maoge raekene.