Van väör nao achter, van lènks nao rechs

Ein circus, dat waor ’t in ‘t Zawpenspatternaat, op de daag dat men zou huere wae väörop zou gaon in ’t Beegse Vastelaovesapparaat. ’t Aojemde spanning, senzasie en op ein gegaeve moment ouch ein bietje vlamme, toen d’r ein madam mit häör fakkels in de gank van ’t gemeinsjapshoes stóng te dramme. Effe later mansluuj in drek; in Beeg is niks te gek. Rob en Kim es Prinsepaar waor dan toch ech de apotheose en eine dikke kop daags later de prognoze.

Richtig Vastelaovend viere brènge weer ouch gaer de kènjerkes bie. Daoróm waor ouch de kènjermiddig weer eine houp tamtam en bombarie. De Zawpense hawte amuzement gaer in eige handj en zörge zóa dat Beeg Beeg blif, de gemeinsjap sterk is, dat sjöp eine bandj. Zank, dans en läötjes in eine heerlikke sfeer brachte ós dan ouch Robin en Amber es Jeugprinsepaar, kompleet zeen v’r dan bienao weer.

De hóndj van Sjaak is dit jaor get minder mit ziene baas ein blökske óm gegange, ómdat hae, door ziene inzat, es Iërezawpens de sjerp woordt ómgehange. Ziene inzat väör Oos Hoes, de Zonnebloem en de Pènkste waore de Zawpense opgevalle en zóa kooste ze dit jaor de awwe oetbater van de Kestaanjeleboum in de sjienwerper neerstalle. Wil en Monique oet de Meister Spiëstraot ginge ós dit jaor väörop bie de awwer luuj oet de gemeinsjap. Laeftied wilt in Beeg niks zègke, dat bliek, want zeker zie gove dèks in polonaes de aaftrap!

Wie de daag langer woorte en v’r in de nachte ummer minder ginge sjlaope, kaom de Vastelaovend dunderbie gekraope. Ein lank seizoen van jannewarie tot noe begin miërt, dat is topsport, zóa höb v’r geliërd. Zelfs bie ein van de iëste aktiviteite wóste de adjundante, teves boefjesvrunj, zich neet mië taege ein glaas beer te kènne waere. ’t Prinsepaar wól zich gaon lègke, mer de boefjes, die waore al zaat en wólle nog get op d’n aovend taere.

Van boefjes nao Poete, want in Buchte wone de vrunj van de Zawpense, dat kèn se neet oetsjloete. Zie organizeerde ’t ALVK, wo Beeg dees edisie sterk vertegenwoordig waor. Schweino mit zien Watkostiband en eine nuje deilnummer; Stehtisch Fetisch waore prezent dit jaor. En volgend jaor, g’r geluif ’t neet, kump ’t evenement äöver de sjloes, door ein bienao te sjlech vastelaovesleed.

De Zawpense dènke dit jaor ekstra aan ’t miljeu; alle oetnuediginge digitaal en niks mië mit breve. Allein de nujeZawpens mit mer leefs 24 blajer Vastelaoveshistorie brachte ze dan toch róndj in ózze kerne, ein edel streve. Wiel Nakken klasjeneert, we huerde van Haan houwe en Chel. Leef luuj, de redaksie haet äöveral óare en ouge, noe liër dat mer sjnel.

Al 44 jaor maog v’r in Beeg genete van de Roepoepers en hunne meziek. Zie viere dit jaor hun jubileum, dat zal uch neet óntgaon zeen, de huers ‘t geliek. Op ’t Aurorabal maakde ze de ein nao de angere hit en zóa zónge zelfs aw bekende nog ein plaetje mit. Maak uch klaor väör nog mië gael-wit-zwart op ’t naojaor, dat g’r ’t mer ónthawt, want dan geit Beeg mitzènge op de beercantus op ’t awt voetbalveldj, noe nog ein oerwoud.

Wie tradisie truk me saoterdigs door Beeg. Daag & Nach mit de Zawpense, raod, heersers en wae dan nog allenej mit deeg. Nao de róndjgank ein heerlik diner, zóa kènne ós Prinsepare d’r weer taegenaan op ’t Daag & Nach film-matinee. De jeug van Day & Night haw bie Nuchter Vertroch aangeklop, wodoor dees tradisie in get frisj en nuujts is óntpóp. De jeug haet de toekoms wurdt dan gezag door boomers en bejaarde, mer ’t is good en blif fejn es die jeug zich toch zóa good bie ein pak en in Beeg lekker kènt aarde.

10:00 oer op zónjig, Aurora geit aope. De iëste glazer beer rake ’t beffet en d’r wurdt flink gezaope. Wie kènt ‘t toch dat zóa’n fiës zóaväöl mansluuj nao eine kaffee vol rouk truk. Ein flinke las óm te torse, zóa vreug op d’n daag, mesjien kump ’t stiekem toch door die perfekte … plaetjes van ’t Geitje. ’t Pyjamabal is ónger angere ein van de hóagtepuntje oet ’t Vastelaoveselan van ózze Prins en zien kammarade. Blik op oneindig, óardoppe in en vaege, want es se boete kumps stuit ’t zónleech dich weer taege.

Es die zón dan ónger is, róndj ein oer of 8 is ’t tied om dich weer aan te riete en d’r op oet te gaon. Die daag vier se same, betrèk ederein en laot nemes staon. ‘t Vastelaoveskonkoer van de Roepoepers is ein prach väörbeeld van kwatsjerie. Dat is ouch de zin van Vastelaovend, vraog ’t mer aan wae dan ouch, weer brènge ’t dich waal bie. Die Muttermale mit hun Jeugprinseblood vele ’t bèste in de smaak en ’t bèd woort laat pas geraak.

Op maonjig de gróate optoch door de Beegter straote. ’t Waor nog effe spannend, mer door de inzat van ózze gemeinsjap höbbe Rob en Kim toch genaote. Gróate groepe, einzelgängers en kleiner groepe mit verkleide, in de vol zón door Beeg, de koos ’t neet vermeide. De zjurie waor ’t meist ónger de indrök van de Beegse Vruikes, die mit hun circusdere de 1e pries dege óntluike. Bram Francot es jónge einzelgänger veel in de pries en Pap's, mam's en de poete dreijde zich in hun achbaan ram gries.

De Zawpenstempel waor ouch op deensdig tot de nok gevöld, want ein gedeilte van ’t Brendariskommitee haw zich in ein te strang pekske gehuld. Frenske waor gaw boete, door ein van die Boefjespoete. Nog eine kiër blaosmeziek hiej aan de Maas, want mit de Ammezjuurpries is dit jaor Anouk Vrencken ederein de baas.

De Prins in de erm, Prinses aan dien ziej. Van lènks nao rechs sjoenkele mit ederein en alles d’r bie. Van väör nao achter gedaon en gekwatsj, want mit die daag haet nemes ein kluër op de patsj. Beeg haet gevierd en läöt zich neet kènne. Toch is ’t zóa wuut noe, de klok die geit wènne. Óm èllef op èllef brent Frenske de prie, mer ich bèn tevreje, want ich waor d’r bie! Es ‘t weer d’r op aankump, staon ich drek weer in mien pekske boete, mer noe is ’t aan de hóaghede óm dit jaor ’t Vastlaovesbook te sjloete.