Brendarisgedich 2020: Wat ’n laeve in 11 deile

1
op de 11e van de 11e woort ’t nuje vastelaovessezoen in ’t Patternaat in gang gesjaote
ein fantasties jebelejumsezoen woort daomit väör èns en väör altied aafgesjlaote
mit de bekèndmaking van ’t motto “wat ’n laeve” koos ’t raoje nao de nuuj heersers beginne
en maogde de vastelaovesgekke zich gaon bedènke wat ze dao op kooste verzinne

2
op 11 jannewarie waor de Prinsoetreuping en broesjde de Zawpenstempel van ‘t laeve
ein spannend verhaol, aafgekeke van Netflix, moos oeteindelik dudelikheid äöver de nuuj heersers gaeve
de ènnigste man van de Raod van 11 mit 4 x 11 jaor op de pókkel, woort zelf ‘ns ekstra in ’t leech gezat
en mit Theo Mostert waor de pos van Iërezawpens ouch door de krekke man bezat

3
raar mer waor, mer ein jóngerevereinging moos ’t Senioreprinsepaar gaon levere dit jaor
oh wat eine Kwatsj, mer Thei en Lyan zeen dat toch mer sjóan gewore, ech waor
en óngerwiel de Roepoepers zich de blaore oppe luppe speelde en de hapklaore laote aan de man woorte gebrach
kneep Roy ‘m d’r stiekem tössjenoet óm drek daonao same mit ziene Sonja es Prinsepaar 2020 op de bühn te staon mit eine straolende lach

4
D’n daag daonao moos eine ram spannende middig nog gaan bepale wae dit sezoen zou gaon regere es ’t Jeugprinsepaar in ‘t Zawpensriek
en dat woorte ten lange lèste Joris en Saar, ’t plaetje waor daomit kompleet en prachtig wie noe bliek
‘t waekènj d’r nao waor weer ’t fameuze thekezènge van de Roepoepers en is aan de hóaghede in Tudder ein bezeuk gebrach
en weer ein waek later waor de Prinsenpronkzitting in Genk en woort bie de finale van ’t hanekriëje (mer ouch bie de Vrouwluujzitting) zeker gein eike gelach

5
’t gemeintelik vastelaovestreffe waor dit jaor in Sanderbout op väörmalig gewiede gróndj
de Koelpköp oet die wiek krege ein sjóan evenement in de aw kirk prima róndj
en door, op nao de get krankere en awwer luuj van ’t Zawpensriek, noe in Zitterd en Bor gehoes
de hóaghede gove ze mit hun aanwezigheid en ein lekker nónnevot weer ein bitje ’t geveul van “thoes”

6
en toen op nao de mansluujzitting in ’t Waterratteriek, dao wo ózze Prins is opgegreujd, zóa stuit toch in de beuk
ein gezellig festijn, en bienao de ènnigste mäögelikheid óm de zöstervereiniging te kènne veriëre mit ein bezeuk
ouch brachte de hóaghede en hun gevolg gaer ein bezeuk aan ’t tradisjonele Sjeepsbelbal wo ouch de Roepoepers hun muzikale opwachting maakde
wonao ’t gevuchel óndanks d’n helle wèndj nog opper tied op de resepsie van de Katers in Houtem geraakde

7.
midwaeks stónge bezeuke aan get aafdeilinge van Pergamijn in Gelaen en Lömmerich op ’t program, mit hiël väöl blie gezichte
dan zuus te dat zóa’n bezeukskes zeker de meujte waerd zeen óm te blieve verrichte
op Valentijnsdag waor ’t bal van Argo in ’t Reuberiek lekker drök en door de meiste bezoog oppe fits
en ’t dao op volgend wiekent mit de gróate Prinseresepsie en gezellige Senioremiddig waor ouch weer ram blits

8.
wo op ’t Holles ‘t woord Moorkop, ómdat dat neet mië sjient te kènne, oet de beuk is gesjreve
woort, krek wie bie Nónk Jos, e dropje trök ómgeduip nao e zwartje en dat is ’t de ganse vastelaovend zóa gebleve
ouch woort ónger invloed van Prinses Sonja flink mit de rollende R gespraoke
en wóste de Prinsesse ummer weer Rosjee te vènje väör ein lekker welske, gelökkig hawt dae hiebie niks gebraoke

9.
trök nao ’t program van de hóaghede, want de sjläöteläöverdrachte bie de Louverman stónge ouch weer op de aksielies
en dus krege de heersers op goonsdig of dónderdig (de lèste kiër van Burgervader Sjraar) vanaaf dat moment weer alle mach in hanj, mit eine echte sjläötel es bewies.
eine primeur dit jaor op vriedig, want noe de kènjer oet Beeg en Obbeeg same sjlummer waere gemaak
lepe de Reube mit in de kènjeroptoch van de Zawpense, mer zeen de fusiebespraekinge nog lang neet gestart, laot staon gestaak

10.
nog mië primeurs, want väör ’t dinere mit de Prins reje twië Prinsewagels van de Zawpense in ’t Reuberiek en haw ’t Beegter Vastelaoves Konkoer, mit es wènnaars Birgit, Marita en Anja, bie Mie van Dora ein ech kefee
en op maonjig troch de gróate (get naten) optoch, mit de Prins van Reube, weer, mit Carmen van de Knub, Bib en Marietje en de Beegse Vruikes es wènnaars van eine troffee
‘t ónger of baove water bal, ‘t Boetenaards bal, ’t waor allemaole grandioos en ’t nao waereld deredaag oetgeweke gawzetrèkke, woort door de iëste Beegse Van Boete Nao Bènne Zitting prima opgevange
es ’t aan the one and only Mister Loco Loco haw gelaege, haw hae noe nog oppe bühn in ‘t Patternaat gestange

11
en leef zawpense, ouch aan dit sezoen kump noe ’n ènj, weer höbbe same mit de hóaghede genaote
mer ze gaon uch noe offesjeel in die hoedanigheid verlaote
ze staeke Frenske in de fik, w’r laote ein traon, ’t is gedaon, tied óm “wat ’n laeve” aaf te sjloete
en de Zawpense houpe uch gaer bie ein van de Beegter Aovende op 20, 21 en 22 november in ‘t Patternaat te maoge begroete