Aan alle inwoners van ós Zawpenseriek

28 februari 2024

Vanaaf ’t moment dat weer zeen oetgerope höbbe weer es Hóagwaardighede maoge genete van ‘ne FANTASTIESE Vastelaovend in Beeg. Dees sjóan momente hawwe weer neet zónger uch kènne belaeve. Daoróm wille weer bie deze alle inwoners van Beeg, Papenhaove en Sjipperskirk bedanke dat weer same mit uch 5 daag lang höbbe kènne en maoge genete.

Weer wille de Zawpense bedanke väör de organizasie van de prinseoetreuping, kènjermiddig, resepsie, optoch en de Beegse Bènne Zitting, ’t ontzörge en vot nao drage, zaotdat ’t ós es Hóagwaardighede aan niks te kort kaom.

Daonaeve wille weer de Beegter Bleumkes, de awwervereiniging van Bs. de Kingbaek, Café Aurora, Daag en Nach, Nuchter Vertroch en de Roepoepers bedanke väör de organizasie van alle angere Vastelaovensaktiviteite is ós sjóane dörp. Mede hie door höbbe weer 5 daag Vastelaovend in eige dörp.

Dank aan de oetbaaters van de keffees in Beeg en alle vriewilligers van de vereiniginge, die ós en alle Vastelaovensvierders, höbbe bedeent van ’s mörges vreug tot ’s aoves laat.

Weer höbbe genaote van alle kreativiteit en muzikaliteit van uch allemaol, mit name op zónjigaovend tiejes ’t Beegter Vastelaoves Konkoer en op maonjig in de gróate optoch, wat ein kluerrieke krejasies höbbe weer aan ós väörbie zeen trekke.

Meziek speelt ummer ’n belangrieke rol mit de Vastelaovend en weer wille dan ouch Hofkapel Daag en Nach, de Roepoepers, Nuchter Vertroch, de Nuuj hermenie en alle angere muzikante bedanke väör hunne inbrèng tiejes de Vastelaovend in Beeg.

Tot slot wille weer ederein nog bedanke väör alle felisitasies, kaarte en kado’s die weer allemaol höbbe maoge ontvange.

’t Waor kort mer krachtig! Väöl te snel väörbie, mer ein ónbesjriefelikke ervaring die nemes ós mië aafnump!

Names de Zawpense en de Hóagwaardighede van 2024, bedank!

Zawpense Alaaf!