Wat vlug de tied, hawfvaste is inmiddels ouch alweer eine tied väörbie en weer höbbe al kènne genete van ein paar daag lekker lentewaer.

 

Langzaamaan is ederein weer planne te make väör alle aktiviteite in ’t väörjaor. Maar weer dinke toch nog efkes trök aan de Vastelaovend, vief daag sjpas en plezeer in ós Zawpenseriek!

Weer höbbe ós ontzettend veriërd geveuld dat weer dit jaor väörop mochte gaon mit de Vastelaovend. En wat höbbe weer dao same van GENAOTE!

 

Vanaaf de sjläöteläöverdrach tot aan Frenske verbrenne en alles dao tösje in. ’t Is teväöl óm op te nömme, edere daag van ’s mörgesvreug tot in de late uurkes höbbe weer same mit uch gezonge, gesjpronge en gefiës. Mit es ein van de hóagtepuntje de gróate optoch! Ondanks de waersväörspjellinge haet néme zich dao door laote taege hawte en höbbe weer eine fantastiese optoch gehad. 't Waor sjóan óm te zeen dat zóa väöl luuj oet Beeg en van boete Beeg mit eige geboewde wages en zóaväol entoezjasme van jónk tot awt mit lepe, sjprónge en danste. En dan natuurlik ouch ’t pebliek dat langs de kantj sjtóng te kieke nao al dat sjaons dat väörbie troch.

 

De versjillende optraejes mit spesjaal väör ós gemaakde leedjes en act waore ech in ein woord geweldig. Super sjiek dat ederein zich same haet gepak en zóaväöl meujte haet gedaon óm op die maneer de Vastelaovend tot ein mega sukses te make!

 

Natuurlik wille weer väöral ouch de Zawpense en alle anger vereiniginge in Beeg bedanke väör het organisere van dees sjieke daag en daomit eder jaor d’r weer väör zörge dat Vastelaovend in ós dörpke blif besjtaon! Ouch eine dikke dankjewel aan alle kefees in Beeg wo weer altied mit aope erm woorte ontvange, flink get polonaises höbbe kènne loupe en ederein good verzörg is gewoore.

 

Weer zeen gruetsj op Beeg en gruetsj op uch allemaol!!

 

Names de hóagwaardighede van 2026 harstikke bedank en tot kómmend sezoen! Zawpense Alaaf!

 

Prins Denny I & Prinses Sandra

Jeugprins Nout & Jeugprinses Veerle

Senioreprinses Lies

Iërezawpens Dennis