5 Daag Vastelaovend in Beeg!
En dan is ’t alweer óm! Weer dènke dat weer waal names ederein spraeke es v’r zègke ’t waor eine unieke Vastelaovend. Eine Vastelaovend wo ’t same fiëste en meziek make in ’t middelpuntj stóng. Weer wille alle Zawpense dan ouch bedanke väör deze Vastelaovend.
Es weer efkes trök kieke, kènne v’r stelle dat Beeg op eine korte tied väöl geregeld krig. Weer begooste al op 19 fibberwarie wo de Zawpense intern aafsjied genómme höbbe van de hóagwaardighede van 2020. Same höbbe weer trök gekeke nao hun regeerperiode en dat dae noe toch ech waal väörbie is. Ein waek later trapde de jeug de Vastelaovend aaf mit eine digitale kènjermiddig en ein kènjerbal bie ’t patternaat Oos Hoes. In de aovend repe C.V. De Roepoepe op diverse plekke in Beeg hun hóagwaardighede väör dees daag oet en waor ’t wie vanawts gezellig op ’t Aurorabal. M’n zaog dat de luuj ’t toch waal gemis höbbe.
Op zaoterdigmiddig trokke de Zawpense door Beeg same mit Hofkapel Daag & Nach, mit aansloetend ’t Dinere zónger Prins wobie Fons Jennen vanaaf noe zich verdeend Senator van de Zawpense maog neume! In de aovend waor d’r bie keffee Aurora ein samewirking tösje Daag & Nach en Z.H. Nuchter Vertroch óm de aovend te väörzeen van eine meziekale ómliesting.
’t inmiddels waal tradisjoneel pyjamabal koos ouch weer doorgaon, gelökkig waor de hoes-DJ net op tied herstèld en waor d’r weer genóg rouk in de keffee. Mit ein eige Prinsepaar en Nar ging de Nuuj ’t dörp in en tiejes dae róndjgank kooste zie weer genete van ’t same meziek make! De kènjer kooste later op d’n daag weer heerlik äöver de bühne raoze op ’t sjipsebal, zóa wie zich dat huert. Aangesterk door ein tuutje frit en ein glaeske cola kooste zie door tot in de late uurkes.
Ederein dae op maonjig de beinkes wool strekke koos mitloupe mit de Vastelaoveswanjeling. Ein bóntj gezelschap aangeveurd door Daag & Nach wanjelde door de straote van Beeg. C.V. De Roepoepe verzörgde bie ’t Patternaat dit jaor de prieze, welke oetgereik woorte aan Jos Houben (Einzelgänger), Martijn van den Berg & Irene Wartena (Klein groepe), V.V. De Zawpense (De Bejaardeprins Ed aanmoedigingspries) en de gróate wènnaar Z.H. Nuchter Vertroch (Gróate groepe). Volgend jaor houpe weer natuurlik weer eine echte Gróate Optoch te maoge organizere! En rope alvas ederein op óm mit te doon.
Ónvermeujd ginge de Beegse Vruikes aansloetend door mit eine heuse Dansmarathon wo weer höbbe kènne zeen dat Beegtenaere äöver ein good ritmisch geveul besjikke (op ein paar oetzunjeringe nao. Oet de maot! In de maot!). Zóa es iëder al gezag stóng meziek make in ’t middelpuntj, want ouch deze aovend verzörgde C.V. De Roepoepe aangesterk door Z.H. Nuchter Vertroch de meziek in de Beegter keffees.
Op Vastelaovesdeensdig organizeerde C.V. De Roepoepe ein ram nuuj pleinfiës ‘Veer houwe op de kis ómdat het vastelaovend is’. Gewapend mit kiste, panne, dóaze en stekke (vergezeld door diverse Beegs en boete Beegse artieste) heve zie op de kis. Roy Bus kreeg op dit nuuj fiës oet hanj van de Zawpense de ammezjuurpries oetgereik. ’t nuje Oetbatersteam van Aurora leet nog mer ‘ns zeen dat zie oet ’t goje hout gesneje zeen, 5 daag langk van smörgesvreug tot saoves laat tappe, bakke en fiëste. ’t Teekezènge met de zèngende barvrouwe en DJ Hinterdertheke waor de perfekte äöverbrögging nao ’t ónóntkomelikke moment. Ónger leiding van C.V. De Roepoepe troch ein gezelsjap richting ’t Kaoteplein wo dit jaor ’t Móndjmaske verbrenne waor.
Vanaovend stuit nog ’t Asjkruuske haole en hiëringbiete bie keffee De Mert op ’t program. Mer daonao is ‘t ech klaor.
5 Daag Vastelaovend in Beeg is weer óm. ’t Is gedaon, ich laot ein traon! Zawpense Alaaf!