Brendarisgedich 2023: Es de lóch oranje kluert
Noe de lóch is opgetroch nao ’n paar gekke jaore, höbbe de Zawpense mit man en Moes hunne zoektoch nao de nuje hóagwaardigheidsbekleijers weite te klaore. Daag en nachte ginge väörbie, totdat ze oeteindelijk de klup biejein hawwe, nón de pie.
Naeve ’t Brendariskommitee mit get nuuj jónk blood, vónje ouch de Zawpense ’t dit jaor tied väör eine nuje opzat op hunne oetreupingsdaag, ram good. Op 14 jannewarie waor ’t tied, ’t begoos get besjaaf mer nao ein uurke reep gans Beeg weer alaaf. In de middig begoos mit de kènjermiddig, dao woort de stömming al drek gezat, wat zich de ganse aovend haet väörtgezat.
De jeug van Beeg spróng dae middig op en neer en ouch de breefkes mit ‘t potensjele jeugprinsepaar waore d’r weer. Achter de buhne waor de spanning nao de trèkking effe te väöl, mer door vrunj en vriendinne kaom dat gans good. Ram gruetsj touverde de Zawpense dao dan ouch Prins Raf en Prinses Stella oet de hóage hood.
Nao de middig wurdt ’t aovend en de Beegter Bleumkes hawwe hun diner sjus op, tot dat dao nao hun gróate verrassing Bea van Es es iërezawpens gepresenteerd woort, top!
Eine dans van lètters en oetroopteikes beteikende väör Beeg ein gróat kadoo, want dao stóng ze dan väör uch: Maria van de EHBO!
’t Rieke woort compleet gemaak mit ein jónk stèl oet de Mauritsstraot. Nao al dae corona-ellende haw de lóch zich baove Beeg eindelik weer opgeklaord! Timo de 1e en zien Prinses Sylvie kaome achter de glinsterde slingers teväörsjien en me zaog eine flits oranje achter de maonesjien.
De nach waor lank en de sjlaop neet ech lang, want daags d’r op moos hawf Beeg weer aan de gang. De róndjgank troch door straote en stege en zelfs de Witsemann oet Tudder zeen kómme äövervlege. Daag en Nach, same mit Nuchter Vertroch en de ganse bende vrunj troch mit in de route, óm oeteindelik mit z’n allen bie Aurora aaf te sjloete. ’t Prinseleed klónk live oet de trómpètte wobie Timo ouch zien kael aope moos zètte.
De gebroekelikke aktiviteite stónge oppe planning enkele waeke later. Nao de Spassbinken in Genk, de vrouwluujzitting in Beeg, ’t frühsjoppe in Tudder en ’t ALVK nog get later, kooste de kostuums gekaerd waere, mit ein söpke en get water. De Prinses wól gaer nao de resepsie in Obbeeg, mer de Prins haw nog ein konzert mit Aurora, wo dae ouch nog aan mitdeeg.
De Perganaze en ’t bal van Argo waore ouch memorabel, mit es kees oppe taart ein optraeje van de oma van de Jeugprinses, ein gróat sukses. Zóa troch de Zawpensekaravaan ummer wujer, langs de Burgemeister mit zien kètting, tot de Katers in Houtem, ouch jeder jaor ein belaeving.
Ouch de awwer en minder fitte luuj maogde ein bezeukske verwachte van de ganse bubs. Want Beeg blif Beeg, en zóa mót dat blieve, ouch es se dien woonplaats neet mië in Beeg höbs. En spesjaal ginge ze langs bie Thieu Stauder, eine miensj mit väöl bewónjering, dae weer gans oplaefde van ’t zeen van ZIEN vereiniging.
Op tied van niks kaom de resepsie d’raan. De riej bleef mer kómme, de luuj hawwe zich weer vanalles verzónne. Óngernummers, vereiniginge en partekelere, allemaol dao óm hun eige betrokkene te iëre. De vrunj van de prins begoochelde hunne maagdelijke hóagheid mit ein joekelig gróat raad, wo d’r drek eine ruk aan goof, hunne kammeraad. De aovend ging nog effe door in ’t Prinselikke palies, wo nog get krokandelle gebakke woorte, eine waore pries!
De raod en hun gevuggel ’s angerendaags in auto’s gevawwe, op nao Bor, wo Prinses Sylvie en de vrouwluuj van Handjbalvereiniging Bor eine wedstrijd hawwe. ’t Trómpötgeschal en de aanmoediginge bleke good, want de vrouwluuj scoorde de ein nao de anger goal en dat neet èns mit de voot.
De sjläöteläöverdrach waor in hanj van de Zawpense in hunne tempel. De kènjer ontvinge de sjläötel van ’t törp oet hanj van wethouder Salvino, woväör de de sjloes gelökkig neet mië oetzuut es drempel. Op dónderdig kaom de burgemeister langs mit ziene sjoffeur. Ouch väör häöm is Beeg neet mië de primeur. Hae brach ein buut in ein tón, dat waor dan waal weer zien debuut es ‘patron’.
Om de jeug ’t geveul van Vastelaovend bie te brènge, wurdt al jaore eine kènjeroptoch georganizeerd. Dit jaor same mit de Reube in ein gróate polonaeze, die väör ’t iës in jaore ouch eine plaetske in dit gedich kriege. Punaeze!
’s Aoves gove de Roepoepers weer awwerwèts gaas op ’t Aurorabal, vergaet neet, de papa’s van Nuchter Vertroch, after all. Wederom waor ’t gezellig en struemde de kraan riekelik, wonao ós hóaghede ’t bèd raakde, eindelik.
Zaoterdes is ‘t ‘s mörges ummer röstig in Beeg. Ederein raap zich dan biejein, ouch die wat get vreug gepiek hawwe, zóa wie mènnigein. De Vastelaovend in Beeg kènt natuurlik neet zónger ’t bal van Daag en Nach, wo dit jaor de jeug zich get väör haw bedach. Bassie en Adriaan kalde alles aan ein en de polka’s vloge dich om te óare, zoa fejn.
De lèste jaore kèn se neet óm ze haer en dao waore ze dan eindelik, de zate hermenie van Sylvie en ‘kleine Bèr’. Hun vrunj en vrindinne wóste weer neet van oetsjeije, mer kooste d’r waal eine richtige aafsjloeter van breije.
Op zónjig hees de Prins zich weer in de badjas om zich te verzoepe op ’t pyjamabal. Ouch dit jaor waor ’t mit de Geit weer eine gróate verkesstal. De kids rende in de middig róndj door de zaal en zelfs de Boefjes maakde nog kabaal.
’s Aoves waor ’t weer pries. De Roepoepers en hun Beegter Vastelaoveskonkoer broke ram ’t ies. Ederein haw zich same gepak in de Beegter kaffees mit ein act of plaat en ouch bie Mie op Staai woort ’t nog erg laat. Oeteindelik kreeg Onozil Brass de zaal ech tot zwiege, wat ouch de zjurie tot gróate huegtes deeg stiege.
D’n optoch troch eindelik weer door de straote, ein drökte, eder hoes waor verlaote. Blawwe, oranje of zwarte rouk zit nog bie ederein in de naas, mer oeteindelik waor toch ‘Gewuen ómdat ’t kènt’ weer de gróate baas. Jos Houben bie de einzelgängers en de Beegter Bleumkes bie de klein groepe brachte de sjóanste krejasies en acts, wat leidde tot mènnig staonde ovasies.
Nog eine kiër goof me richtig gaas hie vandaag aan de Maas. De Beegse Bènnezitting is inmiddels ouch tradisie en d’r woort weer flink gezjwaas. Mit Karel, de Knöppele en Beegse blaosmeziek zeen v’r hie in ós dörpke de käöning te riek. Sjors Hendriks oet de Sjipperskirk wón dit jaor de Ammezjuurpries, gein wónjer, want hae speelde zich mit die daag ram gries.
V’r kieke trök op ein geweldige tied mit sjpas en plezeer en zeen ós volgend jaor weer. D’n iër is aan de Prins en zien vlam óm Frenske te laote fikke, dat Beeg zich d’r neer kènt lègke en kènt gaon aafkikke. V’r sjnappe ós same nog eine kiër vas, ein leedje en ’n träönke, want leech wurdt ’t mörge pas!
